Украина „и сите нејзини сојузници“ се подготвени за „целосен и безусловен“ прекин на огнот почнувајќи од понеделник, што може да го „отвори патот за мировни преговори“, изјави во саботата украинскиот министер за надворешни работи Андриј Сибиха за време на заедничката посета на Киев на германскиот канцелар Фридрих Мерц, францускиот претседател Емануел Макрон, полскиот премиер Доналд Туск и британскиот премиер Кир Стармер.
Еден ден откако Русија одржа голема воена парада во Москва за годишнината од победата во Втората светска војна, четворицата шефови на држави и влади од Германија, Франција, Велика Британија и Полска се сретнаа со украинскиот претседател Володимир Зеленски во главниот град на Украина. За време на нивната средба, петте политичари имале и „продуктивен“ телефонски разговор со американскиот претседател Доналд Трамп за „мировните напори“ за Украина, објасни украинскиот министер за надворешни работи Сибиха на X. Трамп со недели повикува на 30-дневен прекин на огнот во војната.
Поддршка за Украина
Мерц, Макрон и Стармер отпатуваа заедно со воз до Киев во петокот вечерта, каде што им се придружи и Туск, што е прва заедничка посета на шефови на држави и влади од четирите европски земји на Украина. Тоа се случи само еден ден по воената „Парада на победата“ во Москва, при што рускиот претседател Владимир Путин постојано правеше паралели меѓу борбата на Црвената армија против нацистите во Втората светска војна и војната на Русија во Украина, која Путин ја започна во февруари 2022 година.
Уште пред нивното заминување за Киев, четворицата европски шефови на држави и влади изјавија дека сакаат да го зголемат притисокот врз руската „воена машина“ и да ја продолжат својата поддршка за Украина додека Москва не биде подготвена да се согласи на прекин на огнот.
Урсула фон дер Лајен го поддржа барањето за 30-дневно примирје
Претседателката на Европската комисија Урсула фон дер Лајен, исто така, го поддржа барањето во саботата. ЕУ е подготвена да изврши „силен притисок“ врз Москва и да воведе „понатамошни болни санкции“ во случај на прекршување на примирјето, се вели во нејзиното соопштение на онлајн сервисот X.
Во телевизиско интервју, портпаролот на Кремљ, Дмитри Песков, пак рече дека договорот на Русија за прекин на огнот зависи од прекинот на западните испораки на оружје за Украина. Без прекин на испораката на оружје, прекинот на огнот првенствено ќе биде од корист за Украина во време „кога руските трупи постигнуваат доста сигурен напредок“, изјави Песков за американскиот канал Еј-Би-Си. Портпаролот на Кремљ ја обвини Украина дека не е подготвена за итни преговори.
DW
