Во Италија денеска се одржуваат парламентарни избори кои според последните анкети ќе доведат на власт десничарска коалиција од која Брисел однапред е претпазлив, бидејќи не се сигурни какви промени ќе следат во Рим, пред се во надворешната политика.
Речиси сите се согласуваат дека победник на изборите ќе биде партијата „Браќа на Италија“, предводена од Џорџа Мелони, која треба да формира влада со коалиционите партнери – Лигата предводена од Матео Салвини и остатокот од Форца Италија, предводена од поранешниот премиер Силвио Берлускони, јавуваат агенциите.
Според извештаите, речиси сигурна промена на власта во Италија доаѓа во најчувствителниот момент за Брисел, затоа што може да се доведе во прашање стабилноста на еврозоната, енергетската безбедност и она што во моментов најмногу ја загрижува Европската Унија – односот кон војната во Украина.
Засега, како што стои во новинарските написи, е сигурно само дека идната десничарска влада радикално ќе ја промени позицијата на Италија во однос на мигрантската криза и дека Рим многу веројатно ќе ги затвори границите за мигрантите.
makfax.mk