Претседателката на Мексико, Клаудија Шеинбаум, соопшти дека поднеле тужба против Гугл затоа што во мапите што се користат во САД, „Мексиканскиот Залив“ е преименуван во „Американски Залив“, известува Анадолу.
На дневната прес-конференција во Националната палата во главниот град Мексико Сити, Шеинбаум изјави дека претходно го предупредиле Гугл за ова прашање, но нивните барања не биле исполнети.
„Гугл веќе е тужен. Веќе има првична одлука и ја очекуваме конечната пресуда,“ рече Шеинбаум.
Шеинбаум нагласи дека не се противат на користењето на името „Американски Залив“ за делот што се наоѓа покрај брегот на САД, но дека Гугл не може така да го именува целиот залив.
„Ова е меѓународно прашање. Нашето барање е Гугл да го користи името ‘Американски Залив’ само за делот што му припаѓа на САД, а за деловите што им припаѓаат на Мексико и на Куба, да остане ‘Мексикански Залив’,“ изјави таа.
Претседателката на Мексико додаде дека ова прашање не било дискутирано во телефонските разговори со претседателот на САД, Доналд Трамп.
Трамп, на 20 јануари, потпиша извршна наредба во Белата куќа со која нареди Мексиканскиот Залив да се преименува во „Американски залив“.
Гугл на 11 февруари објави дека во својата апликација за мапи го променил името „Мексикански Залив“ во „Американски залив“.
