Американскиот претседател Доналд Трамп и рускиот претседател Владимир Путин во петок пристигнаа на Алјаска на голем самит и разговори насочени кон можно решение на речиси 42 месеци долгата руска војна против Украина.
Набргу откако „Ер Форс Уан“ слета во Заедничката база Елмендорф, во близина на Анкоридж, околу 10:20 часот по локално време (8:20 по централноевропско време), Белата куќа објави дека претседателот нема да се сретне сам со Путин, како што првично беше планирано.
Државниот секретар Марко Рубио и специјалниот пратеник Стив Виткоф ќе му се придружат, а на Путин ќе му се придружат министерот за надворешни работи Сергеј Лавров и советникот за надворешна политика Јуриј Ушаков, изјави за новинарите портпаролката на Белата куќа, Каролин Левит.
Иако двајцата лидери разговарале најмалку пет пати откако Трамп се врати во Белата куќа во јануари, состанокот на Алјаска ќе биде нивна прва директна средба.
„Гледајте, тој е паметен тип. (Тој) го прави тоа веќе долго време, но и јас сум“, изјави Трамп пред новинарите кратко по полетувањето од аеродромот во Вашингтон. „Се согласуваме. Постојат добри нивоа на почитување од двете страни. И мислам, знаете, нешто ќе произлезе од самитот“.
Иако двајцата лидери разговарале најмалку пет пати откако Трамп се врати во Белата куќа во јануари, средбата на Алјаска ќе биде нивниот прв директен состанок.
Украина е исклучена од преговорите
Бидејќи украинските претставници се исклучени од разговорите, средбата на 15 август, која се одржува во воена база во близина на Анкоридж, се оформува како клучен момент за Украинците изморени од војната, за мировните амбиции на Трамп и за обидите на Путин да ја редефинира позицијата на Русија на светската сцена.
„Сметаме на Америка. Подготвени сме, како и секогаш, да работиме што е можно поефикасно“, напиша украинскиот претседател Володимир Зеленски на Телеграм откако Трамп полета.
„Најважно е оваа средба да отвори вистински пат кон искрен мир и суштински разговори меѓу лидерите во трилатерален формат: Украина, САД и Русија“, напиша Зеленски.
slobodnaevropa.mk
