Новоизбраниот американски претседател Доналд Трамп денес изјави дека смета оти Туркије „ќе го држи клучот за Сирија“ откако по повеќе од пет децении, овој месец заврши владеењето на семејството Асад, и го пофали својот личен однос со турскиот претседател Реџеп Таип Ердоган, јавува Анадолу.
„Никој не знае што ќе се случи со Сирија, но мислам дека Туркије ќе го држи клучот за Сирија“, изјави идниот американски претседател за новинарите на својот имот Мар-а-Лаго. „Мислам дека не сте го слушнале ова од никој друг, но јас сум прилично добар во предвидување“.
Трамп рече дека „Туркије е многу паметна“ и го пофали неговиот личен однос со турскиот претседател Реџеп Таип Ердоган.
„Туркије е голема сила, патем, и со Ердоган одлично се согласував, тој има голема воена сила. И неговата не е истрошена со војна“, им рече Трамп на новинарите на својот имот и додаде: „Тој изгради многу силна, моќна армија“.
Трамп го заобиколи одговорот на прашањето дали ќе ги повлече американските војници од североисточна Сирија, и рече дека Ердоган е „многу паметен човек“.
Бројни аналитичари на надворешната политика и коментатори велат дека Туркије излезе со посилна рака од неодамнешните настани во Сирија.
Во Сирија, САД долго време соработуваат со СДФ како нивен главен партнер против ДЕАШ, и покрај силните приговори од Туркије. Групата е предводена од ЈПГ, сирискиот огранок на ПКК, која е прогласена за терористичка организација од страна на САД и Туркије. Поддршката на Вашингтон за СДФ во голема мера ја влоши напнатоста во билатералните односи меѓу сојузниците во НАТО.
По соборувањето на режимот на сирискиот претседател Башар ал-Асад, траат судирите меѓу СДФ и Сириската национална армија поддржана од Туркије.
Трамп, кој рече дека Туркије стои зад силите што напредуваат во Сирија „без изгубени многу животи“, рече дека Туркије е „многу паметна“.
