Американскиот претседател Доналд Трамп ја повлече поканата до канадскиот премиер Марк Карни да се приклучи на неговиот контроверзен Одбор за мир. Републиканскиот претседател го објави ова во краток пост на неговата онлајн платформа Трут соушал, без да наведе причина. Во четвртокот, на Светскиот економски форум во швајцарскиот алпски град Давос, тој го потпиша основачкиот документ на тоа тело, што критичарите го сметаат за напад врз Обединетите нации.
Првично Одборот, барем официјално, требаше да се фокусира на спроведувањето на мировниот план за Газа. Меѓутоа, веќе се вели дека телото би можело да се занимава со многу други конфликти и да создаде поредок во согласност со желбите на американскиот претседател. Трамп како претседател одлучува кој може да стане член.
Десетици земји се поканети да се приклучат – но досега само неколку се согласија, вклучувајќи и некои авторитарни држави.
Канада е меѓу земјите кои првично не дадоа цврсто ветување. Земјата во принцип би можела да размисли за учество, но деталите сè уште не се финализирани, рече Карни.
Карни ги отфрла тврдењата на Трамп за Канада
Канадскиот премиер се истакна во Давос со импресивен говор. Системот за глобално управување предводен од САД во моментов доживува пресврт, обележан со конкуренција на големите сили и слабеење на редот базиран на правила, рече Карни. Тој не го спомена Трамп по име, но набљудувачите претпоставија дека помисли на него. Американскиот претседател повеќепати изјави дека сака Канада да стане дел од Соединетите Американски Држави.
Трамп очигледно се почувствувал повикан од говорот на Карни – Соединетите Американски Држави отсекогаш биле многу дарежливи кон Канада, рече тој во Давос. Сепак, Карни не покажа многу благодарност во својот говор. „Канада постои благодарејќи на Соединетите Американски Држави, запомни го тоа, Марк, следниот пат кога ќе се огласиш“, нагласи Трамп.
Во меѓувреме, Карни повторно се огласи – и јасно ги негираше тврдењата на Трамп. Канада и САД изградија исклучително партнерство во областите на економијата, безбедноста и културната размена, рече тој во четвртокот. „Но Канада не постои поради Соединетите Американски Држави. Канада напредува затоа што сме Канаѓани.“
DW
