Вселенското летало Одисеј слета денес на кратерот Малаперт А на Месечината, со што стана прво американско летало што слета на Месечината по повеќе од 50 години, јавува Анадолу.
„Интуитив Машинс“ (Intuitive Machines), компанија со седиште во Хјустон што го изгради вселенското летало, стана прва комерцијална компанија што некогаш спуштила вселенско летало на површината на Месечината.
„Може без сомнение да потврдиме дека опремата е на Месечината. Одисеј има нов дом“, рече коосновачот на „Интуитив Машинс“ и главен технолошки директор Тим Крејн во директниот пренос на НАСА од слетувањето.
Леталото беше лансирано од Вселенскиот центар Кенеди во Флорида минатата недела, а во средата влезе во орбитата на Месечината.
Слетувањето на Месечината е прво американско слетување на Месечината по програмата Аполо во 1972 година.
Одисеј на Месечината ги понел камерите за истражување на промените на површината на Месечината под издувните гасови на моторите на вселенскиот брод, како и уред за анализа на облаците со честички прав што лебдат над површината во самракот поради зрачењето на Сонцето.
„Интуитив машинс“ беше една од неколкуте компании одобрени од американската вселенска агенција за изградба на приватни лунарни лендери што би можеле да праќаат научен корисен товар во вселената.
НАСА вчера ѝ плати на компанијата пријавени 118 милиони долари за мисијата на Месечината.
Експертите велат дека овие роботски мисии се важни за истражување на Месечината, а НАСА и Канадската вселенска агенција се подготвуваат да испратат четворица астронаути да летаат околу Месечината во претстојната мисија Артемида II следната година.
извор:Анадолу.
фото:Анадолу.
