Американскиот астронаут, кој своевремено служел како војник во мисија во Босна и Херцеговина, Френк Рубио, стана рекордер на НАСА по бројот на денови поминати во континуитет во вселената, поточно на Меѓународната вселенска станица, јавува Анадолу.
„Астронаутот Френк Рубио штотуку постави нов американски рекорд во вселенски летови, надминувајќи го претходниот рекорд од 355 последователни денови на вселенската станица. Ова сега е најдолгата мисија за кој било од нашите астронаути на НАСА. Тој треба да се врати на Земјата на 27 септември, поминувајќи 371 ден во вселената“, објави НАСА на платформата X, порано позната како Твитер.
Претходниот рекорд беше поставен во март 2022 година од астронаутот Марк Ванде Хеи.
Рубио во вселената замина со рускиот вселенски брод „Сојуз МС-22“ на 21 септември 2022 година, заедно со космонаутите Сергеј Прокопјев и Дмитриј Петелин.
Екипажот требаше да се врати на Земјата по околу шест месеци, но поради големо истекување на течноста за ладење, нивната вселенска капсула мораше да се врати на Земјата без својот екипаж овој март.
Беше испратено ново летало за да го врати екипажот дома, но не пред Рубио да го собори американскиот рекорд за најдолг престој во вселената.
Истражувачите ги интересираат ефектите на долготрајните вселенски летови врз човечкото тело, и тоа како микрогравитацијата влијае на коскената маса.
Но, светскиот рекорд за најдолг индивидуален престој во вселената му припаѓа на рускиот космонаут Валериј Пољаков, кој помина 437 дена во орбитата на Земјата. Пољаков почина лани во септември на 80-годишна возраст.
Рубио беше избран од НАСА да се приклучи на класата кандидати за астронаути во 2017 година, според НАСА, а тој се пријави на должност во август 2017 година.
Рубио е од Флорида и дипломирал на Воената академија на САД во 1998 година, а докторирал во 2010 година на Универзитетот за медицински науки за униформираните сили (USU). Рубио беше и пилот на хеликоптерот „Црн јастреб“ и летал повеќе од 1.100 часа, и во мисии во Босна и Херцеговина, Авганистан и Ирак. Тој е член на НАСА од август 2017 година.
извор:Анадолу.
фото:Анадолу.
