Потпретседателот на САД, Џеј Ди Венс, на Минхенската безбедносна конференција се осврна на тоа што тој го претстави како „повлекување на Европа од некои од нејзините најфундаментални вредности“. Германскиот министер за одбрана Борис Писториус и шефицата за надворешна политика на Европската унија, Каја Калас, ги отфрлија критиките од Венс.
Се чини дека слободата на говорот е „во повлекување“ низ Европа и дека „непроверената“ имиграција претставува страшна закана за континентот, рече Џеј Ди Венс, потпретседател на Соединетите Американски Држави (САД) во обраќањето на Минхенската безбедносна конференција што почна на 14 февруари и ќе трае во следните три дена.
Додека во центар на внимание во пресрет на конференцијата беше притисокот на американскиот претседател Доналд Трамп да бара мировен договор што ќе стави крај на сеопфатната руска војна против Украина, Венс се осврна на тоа што тој го претстави како отстапување на Европа од нејзините основни вредности.
„Заканата за која најмногу се грижам во однос на Европа не е Русија. Тоа не е Кина, не е кој било друг надворешен актер. Тоа за што се грижам е заканата одвнатре. Повлекувањето на Европа од некои од нејзините најфундаментални вредности“, рече Венс.
slobodnaevropa.mk
