Кралицата Маргрета Втора на 14 јануари ја потпиша својата абдикација на состанокот со данскиот кабинет, по повеќе од пет децении служба.
Нејзиниот 55-годишен син и престолонаследник Фредерик беше прогласен за крал пред народот на балконот на палатата Кристијансборг во срцето на данската престолнина, објави slobodnaevropa.mk.
Илјадници луѓе денеска се собраа во центарот на Копенхаген за да бидат сведоци на историскиот момент во една од најстарите монархии во светот.
Данската национална телевизија го пренесуваше настанот во живо, пишува новинската агенција АП.
83-годишната Маргрета е првиот дански монарх кој доброволно абдицира во речиси 900 години.
Повикувајќи се на здравствени проблеми, Маргрета на новогодишната ноќ објави дека ќе се повлече, со што ја запрепасти нацијата.
Дури ни премиерот Мете Фредериксен не беше свесен за намерите на кралицата до непосредно пред објавувањето.
Маргрета ги известила Фредерик и неговиот помлад брат Јоаким само три дена претходно, пишува весникот Берлингске, повикувајќи се на кралската палата, пренесе АП.
Маргрета беше подложена на тешка операција на грбот минатиот февруари и се врати на работа дури во април 2023 година.
“Кралицата е на тронот повеќе од 50 години. А таа е исклучително почитувана и популарна личност, па луѓето не го очекуваа ова и беа во шок”, изјави данскиот експерт за историја на кралството Томас Ларсен.
Последен пат данскиот монарх доброволно поднесе оставка во 1146 година, кога кралот Ерик III. Лам отстапи за да влезе во манастир.
Маргрета абдицираше на истиот датум кога седна на тронот во 1972 година по смртта на нејзиниот татко, кралот Фредерик IX.
Данската монархија ги следи своите корени од викиншкиот крал Горм Стариот од 10 век, што ја прави најстарата монархија во Европа и една од најстарите во светот.
Денес, должностите на данското кралско семејство се главно церемонијални.
Абдикацијата ќе ја остави Данска со две кралици: Маргрета ќе ја задржи титулата додека сопругата на Фредерик родена во Австралија ќе стане кралица Мери.
Најстариот син на Фредерик и Марија, Кристијан (18) ќе стане наследник на тронот.
Луѓето почнаа да се собираат пред парламентот рано во неделата, а многумина беа на улиците на главната шопинг улица во Копенхаген, која беше украсена со црвено-бели дански знамиња.
Во неколку продавници беа закачени фотографии од кралицата и идниот крал. Локалните медиуми соопштија дека стотици се упатиле кон данската престолнина од целата земја, а други гледале телевизија во живо за да бидат сведоци на настанот.
Градските автобуси беа украсени со помали копии на данското знаме како што е вообичаено за време на кралските настани.
Бендот на кралската гарда продефилираше низ центарот на Копенхаген, но носеше црвени јакни, наместо вообичаените црни, за да ги одбележи големите настани.
Луѓето, завиткани во топла облека поради студот, иако беше сончев ден, возбудено вееја со своите знамиња додека бендот настапуваше.
Жителот на Копенхаген, Рене Јенсен, кој носеше реплика на кралската облека и виолетова круна со скапоцени камења на главата, рече дека очекува Фредерик да биде „кралот на нацијата, кој ќе не претставува насекаде“.
За разлика од Обединетото Кралство, во Данска нема церемонија на крунисување.
Премиерот официјално го прогласи Фредерик за крал од балконот на палатата Кристијансборг, во кој се сместени владините канцеларии, парламентот и Врховниот суд, како и кралските штали и кралските соби за прием.
Новиот крал и кралицата ја напуштаат палатата Кристијансборг во кочија и се враќаат во кралската резиденција Амалиенборг, каде што живее и Маргрета, но во посебна зграда.
Кралскиот грб ќе биде спуштен во домот на Маргрета и ќе се подигне на зградата во која живеат Фредерик и Мери.
Четири топови во пристаништето во Копенхаген испукаа три пати по 27 истрели за да го одбележат трансферот на власта.
Во доцните попладневни часови, забавниот парк Тиволи Гарденс во Копенхаген планира да ги прослави новиот крал и новата кралица со најголемиот огномет во 180-годишната историја на паркот.
Истражувањето нарачано од данскиот јавен радиодифузен сервис ДР и објавено во петокот покажа дека 79 отсто од 1.037 луѓе анкетирани од анкетарот на Епинион рекле дека веруваат дека Фредерик е подготвен да ја преземе власта.
