Во сите казина и обложувалници, македонските граѓани минатата година оставиле 526,5 милиони евра, а вкупната добивка на сите вакви лиценцирани компании е 37,6 милиони евра, покажуваат податоците од платформата БизнисМрежа.мк
Порталот „Пари“ детално со приходи и добивки веќе ги објави финансиските резулатати на 18 највлијателни комании од овој сектор каде што се прави промет од 488,3 милиони евра https://pari.com.mk/kockanje-oblozuvanje-polovina-milijarda-evra-potrosile-gragjanite-na-kocka-za-edna-godina/. Сега, предемет на нашата анализа се платите на вработените во овој сектор. А бројот на вработени не е ни малку за потценување. Таму леб вадат околу 10.000 работници.
Минатата година просечната нето-плата во државата била 28.718 денари. Податоците покажуваат дека во најголемата компанија по промет ПРО-БЕТИНГ Скопје каде влегле 93,7 милиони евра и каде што лани работеле 185 вработни, просечната нето-плата е далеку под просекот и изнесувала 18.354 денари. Но треба да се земе предвид дека и добивката и била скромни 78.000 евра. Исто така, компанијата успела занчително да го зголеми бројот на вработените во однос на 2020 кога имаше многу карантини и кога во просек таму работеле 107 работници. Во 2020 година просечната –нето плата била 16.978 денари.
СПОРТ – ЛАИФ ТРЕЈД е најголемиот работодавач. Таму имало поголем просек од републичкиот, односно просечната нето платата била 29.380 денари, што е значителен скок во однос на претходната година кога просекот им бил 23.998 денари. Лани во оваа компанија работеле дури 909 вработени , што е слично на претходната година кога работеле 915 вработени.
ТОП 10 КОМПАНИИ ПО БРОЈ НА ВРАБОТЕНИ
| КОМПАНИЈА | ПРИХОД 2021 (ВО ЕВРА) | ДОБИВКА 2021 (ВО ЕВРА) | ВРАБОТЕНИ | ПРОСЕЧНА ПЛАТА (ВО ДЕНАРИ) |
|---|---|---|---|---|
| СПОРТ – ЛАИФ ТРЕЈД ДОО Скопје | 82,8 милиони | 2,5 милиони | 909 | 29.380 |
| МА ГАМИНГ ДООЕЛ Скопје | 21,3 милиони | – 720.000 (загуба) | 618 | 27.076 |
| ДЕЛТА БЕТ ДОО Скопје | 44,2 милиони | 1 милион | 606 | 21.233 |
| СЕНАТОР МАКЕДОНИЈА ДОО Скопје | 20,7 милиони | -2,1 милион (загуба) | 579 | 27.967 |
| МАКОТЕН ДООЕЛ Гевгелија | 15,8 милиони | 564.000 | 545 | 29.002 |
| КЛУБ СПОРТ 77 увоз-извоз ДОО Битола | 11,5 милиони | 460.000 | 494 | 19.788 |
| МАСТЕРБЕТ ДООЕЛ Скопје | 17 милиони | 166.000 | 425 | 29.192 |
| ЗЛАТНА КОПАЧКА -ЕДЕН ДОО Скопје | 36,2 милиони | 87.000 | 377 | 20.015 |
| ТХЕ-СЛОТС ДОО Скопје | 8,7 милиони | 267.000 | 316 | 17.547 |
| ПРИНЦЕСС ХОТЕЛ И КАЗИНО ДОО Богородица Гевгелија | 17,7 милиони | 955.000 | 237 | 17.806 |
АСОЦИЈАЦИЈА НА ПРИРЕДУВАЧИ НА ИГРИ НА СРЕЌА: ЗА НАС ОСТАНУВА МАЛ ДЕЛ
Од Асоцијацијата на приредувачи на игри на среќа велат дека кога ќе се сумираат приходи и расходи, за приредувачите останува 10% од кои треба да ги покријат трошоците за инвестициите и да остварат заработка што е основна цел на секој бизнис.
Тие за порталот Пари објаснија што прават со приходите:
– Приредувачите на игри на среќа имаат законска обврска за плаќање посебна давачка во вкупен износ од 23%, од кои 1,5% одат за потребите на јавното здравство и 1,5% за потребите на Агенцијата за млади и спорт, а останатите 20% директно се слеваат во централниот Буџет.
– Казината и автомат клубовите дополнително плаќаат годишно и за секоја лиценца која на приредувачите на игри на среќа во строго дефинирана процедура им ја издава Министерството за финансии, а конечно ја одобрува Владата.
– Приредувачите на игри на среќа како правни лица плаќаат и годишен данок на добивка по стапка од 10%. Плус за секоја поединечно остварена добивка од играње приредувачите имаат обврска да платат 15% данок на истата.
– Приредувачите на игри на среќа плаќаат плати за вработените и придонеси од работен однос (со двојни дневници за работа во недела, празници, ноќен труд и сменско работење, бидејќи работното време е 24/7), за 10 илјади вработени.
– Државниот буџет се полни од приредувачите на игри на среќа и преку оданочување на закупнини на деловни простории, ДДВ преку купување опрема, мебел, надоместоци за струја и давање угостителски услуги, со кои се подржуваат меѓу 54 до 100 илјади други работни места надвор од секторот игри на среќа.
КАДЕ ИМА НАЈГОЛЕМА ПЛАТА?
Најголемиот просек е во КАСИНОС АУСТРИА ИНТЕРНАТИОНАЛ МАКЕДОНИЈА ДОО Скопје. Но во оваа компанија има само еден вработен така што тоа е неговата плата и лани била 281.332 денари. Инаку, Државната видеолотарија на РС Македонија – Касинос Аустриа ДОО Скопје (ДВЛМ) е трговско друштво со ограничена одговорност за приредување игри на среќа, во заедничка сопственост на Државна Лотарија на РСМ и КАСИНОС АУСТРИА ИНТЕРНАЦИОНАЛ МАКЕДОНИЈА.
