Според пишувањата на медиумите, технолошкиот милијардер Илон Маск наскоро ќе се откаже од својата позиција како еден од најважните советници на американскиот претседател Доналд Трамп. Трамп пред својот близок круг на советници изјавил дека Маск ќе си замине во следните недели, објави магазинот „Политико“, цитирајќи тројца „луѓе кои се во тек со процесот“. Еј-Би-Си њуз исто така објави дека Трамп дал соодветни изјави на блиски советници.
Според „Политико”, Трамп останува задоволен од работата на Маск, но во изминатите неколку дена двајцата заедно одлучиле дека наскоро ќе дојде време Маск да се врати во својата компанија. Еден од изворите тврди дека Маск најверојатно ќе ја задржи неформалната улога на советник и ќе продолжи да доаѓа повремено во Белата куќа. Друг смета дека секој што мисли дека Маск целосно ќе исчезне од околината на Трамп, се залажува себеси.
Портпаролката на Трамп ги нарече извештаите „ѓубре“
Белата куќа категорично ги отфрли извештаите. Портпаролката на владата Каролин Левит ги нарече тврдењата „ѓубре“. И Маск и Трамп јавно изјавија дека технолошкиот милијардер „ќе се повлече од јавната служба како специјален владин вработен“ откако ќе заврши неговата „неверојатна работа“.
Трамп го овласти шефот на производителот на електрични автомобили Тесла да дејствува како специјален владин претставник за да обезбеди заштеди, па дури и распуштање на владини служби и отпуштање вработени – организирани од „Одделот за владина ефикасност“ (Доге), како оддел на Белата куќа. Во овој контекст, Маск иницираше контроверзни мерки за штедење и отпуштање на илјадници федерални вработени службеници.
Маск моментално го има официјалниот статус на „специјален советник вработен во владата“. Сепак, овој статус се доделува само за 130 дена – во случајот на Маск тоа би било до крајот на мај. Самиот тој за Фокс њуз минатата недела изјави дека ќе го заврши поголемиот дел од својата работа за намалување на трошоците во федералниот буџет за 1 билион долари до крајот на тие 130 дена.
Маск е мета на критики
И влијанието на Доге и на Маск врз владата сега е во фокусот на бројни тужби. Критичарите го обвинуваат претприемачотдека дозволува неговите сопствени економски интереси – како шеф на Тесла, СпејсХ и Х – да влијаат на неговата владина работа.
Во исто време, економската база на Маск исто така е под притисок. Претставник на американската влада изјави за Ројтерс дека инвеститорите на Маск сакаат тој да се врати во неговите компании. Тесла во последно време се бореше со пад на продажбата што ги надмина очекувањата. Меѓутоа, по пишувањето на медиумите за можното повлекување на Маск, акцијата на компанијата закрепна и привремено се зголеми за околу четири отсто.
DW
