Премиерот Христијан Мицкоски денеска на прес конференција истакна дека отворен е јавниот повик за општините за инфраструктурни проекти.
Како што порача, за оваа цел наменети се 250 милиони евра, а право за поднесување имаат општините, општините во Град Скопје и Градот Скопје.
„Испраќам апел што е можно повеќе општини независно од политичката провиненција на градоначалниците да учествуваат во овој повик. Ние сме Влада на сите граѓани, и нашата цел е да се подобри животот на сите граѓани“, порача Мицкоски.
Мицкоски вели дека во минатото се правеле вакви проекти во Градот Скопје, но не во сите општини во толкав обем како што е замислата на овие 250 милиони евра.
„До крајот на годината, со овој повик се ставаат во употреба 6 милијарди денари и ова е првата фаза од вкупно 15 милијарди денари за капитални проекти. Одблиску ќе ја следам реализацијата на проектите, а процесот ќе биде целосно транспарентен и на увид на граѓаните“, додаде Мицкоски.
