Украинскиот парламент усвои резолуција со која се потврдува легитимноста на актуелниот претседател Володимир Зеленски по вчерашниот неуспешен обид. За резолуцијата овојпат гласаа мнозинството од 268 пратеници, а за нејзино усвојување беа потребни вкупно 226 гласа.
Во понеделникот на специјалната седница на украинскиот парламент, резолуцијата доби само 218 гласа. Седницата се одржа во присуство на гости од меѓународната заедница со цел да се одбележи тригодишнината од руската инвазија на Украина. Приближно 54 пратеници присутни во салата за состаноци во понеделникот неочекувано не учествуваа во гласањето. Меѓу нив беа и 38 претставници на партијата на Зеленски. Причините не ги кажаа јавно. Резолуцијата се состои од истиот текст како и претходниот ден: „Украинскиот парламент уште еднаш потсетува дека претседателот на Украина Володимир Зеленски е избран на слободни, транспарентни и демократски избори. Ниту украинскиот народ, ниту парламентот не го доведуваат во прашање неговиот мандат“. Во документот се наведува и дека Зеленски ќе остане на претседателската функција додека новоизбраниот претседател не ја преземе функцијата, а се е во согласност со украинскиот устав. Редовниот мандат на Володимир Зеленски заврши во мај, но изборите не може да се закажат ниту да се одржат поради вонредната состојба која трае три години.
Русија го доведува во прашање легитимитетот на Зеленски, а САД се повеќе притискаат изборите во Украина да се одржат веднаш по завршувањето на конфликтот, за кој во моментов се разговара.
4news.mk
