Со хеликоптер на Хрватското воено воздухопловство денес во Хрватска пристигнаа уште три тешко повредени лица во пожарот во ноќниот клуб во Кочани, јавува Анадолу.
Две повредени лица вчера се транспортирани и примени на клиниката.
Четиричлениот екипаж на хеликоптерот на Хрватското воено воздухопловство, заедно со петчлениот военомедицински тим на хрватската војска, ги презеде пациентите во Скопје и успешно ги пренесе во касарната „Полковник Марко Живковиќ“, соопшти хрватското Министерство за одбрана.
По слетувањето на хеликоптерот, пациентите се преземени од тим на загрепската Итна медицинска помош и пренесени во Клиничкиот болнички центар „Сестри милосрдни“ на понатамошно лекување.
Хеликоптерот на Хрватското воено воздухопловство е пратен да обезбедува хуманитарна помош во Северна Македонија по налог на вицепремиерот и министер за одбрана Иван Анушиќ, во согласност со одлуката на Владата и по претходна согласност од претседателот на Хрватска.
Акцијата е спроведена откако Северна Македонија го активираше Механизмот на Европската Унија за цивилна заштита и побара помош за евакуација на пациентите со тешки изгореници здобиени во пожарот.
Во пожарот во ноќен клуб во Кочани, предизвикан од пиротехнички средства, загинаа 59 лица, а над 170 се повредени.
Утврдено е дека ноќниот клуб нема дозвола за работа. Во Северна Македонија е прогласена седумдневна жалост.
