Хеликоптер падна во реката Хадсон, во близина на долниот дел на Менхетен, во Њујорк, Соединетите Американски Држави (САД), при што загинаа сите шестмина патници што се наоѓале во него, јавува Анадолу.
„Тројца возрасни и три деца биле во хеликоптерот од тип Бел 206 што полетал од Скајпорт во центарот на градот околу 15 часот“, изјави градоначалникот на Њујорк, Ерик Адамс, на прес-конференцијата, додавајќи дека пилотот и семејството биле туристи од Шпанија.
Тој нагласи дека истрагата за причините за несреќата е во тек.
На прес-конференцијата, исто така, зборуваше и комесарката на њујоршката полиција, Џесика Тиш.
„Четири жртви беа прогласени за мртви на местото на несреќата, а уште две беа пренесени во локалните болници, каде што, за жал, им подлегнаа на повредите“, рече таа, но не ги откри нивните идентитети пред да бидат известени семејствата.
Претходно полициската управа на Њујорк потврди дека несреќата се случила „во близина на автопатот Вест Сајд и Спринг Стрит“, предупредувајќи ги возачите и пешаците преку платформата Х „да очекуваат возила за итни случаи и застој во сообраќајот во околните области“.
На видео објавено од случаен минувач се гледа како хеликоптерот вртејќи се паѓа во реката. На медиумските снимки се гледаат чамци за пребарување и спасување што работат во областа.
