Македонскиот кик боксер Бобан Илиоски ја освои титулата на Светското првенство кое се одржува во португалскиот град Албуфеира, откако во денешното финале го совлада Нурбек Уришбоев од Узбекистан со убедливи 3-0.
На патот до златниот медал во категоријата лоу кик до 86 килограми Илиоски дојде со три убедливи победи од по 3-0.
Настапот на Светското првенство во кик бокс македонскиот натпреварувачот го почна со триумф во четвртфиналето над Алберт Угринчиќ од Босна и Херцеговина, а во полуфиналето беше поуспешен од Елјан Алкишијев од Азербејџан.
Минатиот ноември Илиоски ја освои и титулата европски првак во категоријата лоу кик до 86 килограми.
