Богатиот археолошки пејзаж на Туркије содржи клучни показатели за тоа како минатите цивилизации реагирале на климатските предизвици, пишува Анадолу.
Харви Вајс, истакнат професор по археологија на Блискиот Исток при Универзитетот Јеил во САД, води револуционерна студија на древниот локалитет Култепе, близу централен Кајсери, во Туркије, со цел да ги истражи адаптивните стратегии на древните општества при промените во животната средина.
Лоцирано на 20 километри североисточно од Кајсери, Култепе е огромен археолошки локалитет која опфаќа површина од 300 хектари.
Ископувањата, предводени од Фикри Кулакоглу од Универзитетот во Анкара, донесоа на виделина значајни докази за тоа како жителите на регионот живееле и се прилагодувале пред илјадници години.
Вајс, познат по своето истражување за колапсот на Акадската Империја поради силната суша, се приклучи на тимот за ископување со цел да го истражи одговорот на древното општество на климатските промени.
Истражувањето има за цел да го пронајде „начинот на кој Култепе и неговото општество се адаптирале на наглите климатски промени пред 4.200 години“, рече тој.
Многу е важно за историјата на светот, Блискиот Исток и Туркије да се сфати како општествата во големите градови, како што бил Култепе, се адаптирале на големите климатски промени пред 4.200 години, рече Вајс.
Истражувањето на Вајс откри дека пред 4.200 години, големите градби биле претворени во пепел, и биле заменети со помали, поскромни живеалишта. Трансформацијата, смета Вајс, најверојатно била поттикната од климатските промени кои ги принудиле жителите да ги преиспитаат своите животни услови и земјоделските практики.
На крајот од истражувањето „ќе можеме да ги анализираме семињата собрани од подовите на градбите. Анализираните семиња ќе ги дадат датумите и условите со врнежите во времето кога тие растенија растеле“, истакна Вајс.
Тој додаде дека анализата се очекува да даде одговор и врз отпорноста на жителите на Култепе и нивната способност да се адаптираат на притисоците од животната средина.
Работата во Култепе, исто така, повлекува паралели со неговите претходни студии во Сирија и Ирак во близина на турската граница, каде што тој откри дека климатските настани значително влијаеле на Акадската Империја.
Империјата, која контролираше огромно земјоделско земјиште, вклучително и делови од централна Анадолија, во голема мера се потпирала на континуирани врнежи за опстанок.
„Наглите климатски промени ги намалија врнежите за земјоделството напојувано од дождовите, погодувајќи ги Месопотамија и Туркије (Анадолија)“, истакна тој.
Вајс продолжува да ги открива тајните на Култепе, тој ја истакна важноста на локалитетот во разбирањето не само на историјата на регионот, туку и на Туркије.
„Кога дојдов во Култепе, веднаш сфатив дека не може да се разбере историјата на Туркије (Анадолија) без да се разбере историјата на Култепе“, додаде тој.
извор:Анадолу.
фото:Анадолу.