Американскиот републикански претседателски кандидат Доналд Трамп утринава им се заблагодари на Американците за очигледната „чест да биде избран“ на највисоката функција во земјата, јавува Анадолу.
„Сакам да му се заблагодарам на американскиот народ за извонредната чест да бидам избран за ваш 47. претседател и за ваш 45. претседател“, изјави Трамп на приврзаниците во Палм Бич, Флорида, мислејќи на неговиот претходен мандат како претседател од 2017 до 2021 година.
Според предвидувањата на „Фокс њуз“, Трамп обезбеди победа откако на претседателските избори вчера ја победи демократската ривалка, актуелната потпретседателка Камала Харис.
„Ова е величествена победа на американскиот народ која ќе ни овозможи Америка повторно да ја направиме голема“, додаде Трамп.
Ветувајќи дека ќе се бори за секој граѓанин на САД, тој рече:
„Ќе помогнеме нашата земја да заздрави.“
Победата ќе го направи Трамп вториот претседател на САД со неспоени мандати, по Гровер Кливленд, кој освои два неспоени мандати во доцните 1800-ти.
