Едно лице загина, а две се повредени во тешка сообраќајна несреќа што се случи вечерва на патот Битола – Ресен, кај местото Макази, објави Телма.
Според информациите на СВР Битола, несреќата се случила кога патничко возило БМВ со ресенски регистарски таблички, управувано од 46-годишен жител на ресенско село, удрило во автомобил марка „Пежо“ со битолски ознаки. По судирот, „Пежото“ се судрило со друго возило БМВ, кое го управувал 47-годишен жител на Ресен, кој патувал со сопатник.
Како што пренесува Телма, од ударот 46-годишниот возач починал на самото место, а смртта ја констатирал лекар од Итна медицинска помош Ресен. Возачот и сопатникот од другото БМВ се пренесени во Клиничката болница во Битола, каде им се укажува лекарска помош.
Поради несреќата, сообраќајот на делницата од Макази до селото Ѓавато е пренасочен по стариот пат.
4news.mk
