Под влијание на длабок циклонски систем кој надоаѓа од Атлантикот, денес (вторник 11 март) во нашата Република Македонија ќе имаме зголемена облачност а ќе започне да дува и засилен, повремено силен ветер од јужен правец (повремено и локално со брзина од над 75 км/час). Попладне од запад ќе се прошират локални врнежи од дожд кои ќе бидат најмногу застапени токму во западните предели.
Локално врнежите ќе бидат поројни и проследени со појава на грмежи.
Поради силното јужно и југозападно воздушно струење, од Сахара кон нашата Македонија се врши транспорт на прашина и песок, па така и Атмосферата е веќе заматена, а времето понатаму ќе биде мачно и спарно.
Што се однесува до температурите, тие речиси насекаде ќе се искачуваат до близу па и околу 20 степени, а на повеќе места тие ќе надминуваат 20 степени, додека во Повардарието тие се очекува да достигнат до околу 25 степени, а не се исклучува можноста тие и да надминат 25 степени.
Во Скопје и околината ќе имаме слично време како и во останатите предели од нашата Македонија, а тоа е променливо време со засилен до повремено силен ветер од јужен и од југоисточен правец. Попладне и во вечерните часови ќе има повремен локален дожд, во делови од Скопскиот регион тој би можел да биде пороен и проследен со ретки грмежи. Температурата во Скопје и околината се очекува да се искачи близу или до околу 25 степени, најавува метеопрогнозерот Славчо Попоски.
