Научниците извадија длабоки ледени јадра од Антарктикот како дел од проектот „По ЕПИКА – Најстариот мраз“, чија цел е да се открие климатската историја на Земјата од повеќе од 1,2 милиони години, јавува Анадолу.
Проектот, финансиран од Европската комисија и координиран од Институтот за поларни науки на Националниот совет за истражување на Италија (Cnr-Isp), се очекува значително да придонесе за науката за климата.
Ледените јадра, извадени од длабочина од 2.800 метри, се пренесуваат во Европа со истражувачкиот брод „Лаура Баси“, каде што се чуваат во контејнери на -50°C за да се зачуваат. Тие прво ќе пристигнат во Италија пред да бидат пратени во Германија, каде што научниците ќе ги исечат на делови за понатамошно доставување низ повеќе лаборатории.
Истражувачите се надеваат дека ќе ги реконструираат климатските модели, проучувајќи ги атмосферските температури во минатото и концентрациите на стакленички гасови што датираат од пред повеќе од 1,2 милиони години.
Мултинационален тим од истражувачи од 10 европски земји го спроведе дупчењето на мразот во текот на три месеци на надморска височина од 3.200 метри над морското ниво. Работејќи во екстремни услови, каде што просечната летна температура беше -35 °C, тие стигнаа до основата на ледената покривка на Антарктикот.
„Постигнато е извонредно достигнување во текот на последната сезона на дупчење. Последните неколку дена ги планиравме идните анализи што ќе ја откријат историјата на климатските услови во минатото, во последните 1,2 милиони години, а можеби и уште поназад. Со нетрпение чекаме наскоро да ги добиеме примероците“, рече Карло Барбанте, професор на Универзитетот „Ca’ Foscari“ во Венеција и координатор на проектот.
