На денешната Минхенска безбедносна конференција претставник од Македонија учествуваше на тркалезната маса „Отворена врата или отворен крај? – Исполнување на ветувањата за проширување на Европска Унија“, каде беа презентирани ставовите на земјата за евроинтегративниот процес.
Во своето обраќање беше нагласено дека државата и регионот не смеат да останат во бесконечен процес на преговори, туку им е потребна јасна и предвидлива европска перспектива. Според пораката упатена од конференцијата, проширувањето мора да се темели на исполнети критериуми и реален напредок, а не на политички неизвесности.
„На Македонија и на регионот не им треба процес без крај, туку заслужена и предвидлива европска иднина“, беше истакнато на дебатата.
Дополнително беше потенцирано дека реформите и напорите на граѓаните мора да добијат соодветно вреднување, бидејќи долгорочната неизвесност го намалува ентузијазмот за европските реформи и ја поткопува довербата во процесот на проширување.
Учесниците на тркалезната маса се согласија дека кредибилитетот на европската политика на проширување ќе зависи од способноста ветувањата да се претворат во конкретни чекори и временска рамка, што ќе значи нов импулс за целиот регион на Западен Балкан.
