Првиот настап на американскиот претседател Доналд Трамп на гала-вечера со новинари заврши во целосен хаос, откако маж со оружје пробил низ безбедносна бариера во хотел во Вашингтон.
За време на гала-вечерата на престолнината, на која присуствуваа Доналд Трамп, првата дама Меланија Трамп, повеќе членови на кабинетот – меѓу нив министерот за одбрана Пит Хегсет и државниот секретар Марко Рубио, потпретседателот Џеј Ди Венс, како и бројни новинари и гости, одеднаш се слушнале силни пукања.
Додека претседателот седел на бината, во салата одекнале гласни тресоци, за кои дури подоцна било потврдено дека се истрели. Во просторијата настанала паника, а тешко вооружени припадници на обезбедувањето итно влегле во салата. Неколку секунди по инцидентот, Трамп, Меланија Трамп и другите високи државни функционери биле изведени од бината и префрлени на безбедна локација.
Според изјавата на американскиот претседател, ниту еден член на владата не бил повреден. Сепак, еден припадник на обезбедувањето бил застрелан. Благодарение на панцирниот елек, неговата состојба е стабилна, изјави Трамп. Од Тајната служба потврдија дека ранетиот безбедносен службеник веќе е пуштен од болница.
И претседателот и безбедносните служби соопштија дека напаѓачот влетал низ безбедносната контрола во предворјето на хотелот, по што бил совладан и соборен на под од страна на службени лица. Според полицијата, напаѓачот не бил застрелан при апсењето.
Што е познато за напаѓачот и правната постапка
Полицијата соопшти дека напаѓачот со себе носел пушка, пиштол и неколку ножеви. Од Тајната служба информираа дека тој бил запрен „при првиот контакт“. Според полицијата, станува збор за хотелски гостин кој дејствувал сам, а засега нема индикации за други осомничени лица.
DW
