Украинскиот претседател Володимир Зеленски го повика рускиот лидер Владимир Путин на директни мировни преговори, предлагајќи лична средба како начин за ставање крај на војната меѓу Украина и Русија.
Во отворено писмо објавено на веб-страницата на украинската претседателска администрација, Зеленски предложи разговорите да се одржат надвор од Украина и Русија. Како можни локации ги наведе Швајцарија, Турција или некоја арапска земја.
„Украина предлага оваа војна да заврши преку директна комуникација меѓу вас и нас. Предлагам средба“, напиша Зеленски во писмото.
Предлог за прекин на огнот и размена на затвореници
Како прв чекор кон мировен процес, украинскиот претседател предложи прекин на огнот по должината на сегашната фронтовска линија, кој би бил под надзор на САД.
Потоа, според планот на Киев, би следувала размена на воени заробеници по принципот „сите за сите“, како и враќање на цивили и деца кои биле однесени во текот на војната.
Зеленски нагласува дека во преговорите треба да учествуваат и европски и американски претставници, кои би можеле да делуваат и како гарант на евентуален договор.
„Војна без вистинска причина“
Во писмото, украинскиот претседател оценува дека мнозинството Руси се уморни од последиците од војната, вклучително и ракетните и дроновски напади, инфлацијата и недостигот на гориво, и дека се подготвени за мир.
„Оваа војна е ваша лична одлука – војна без вистинска причина. Така ќе остане запаметена во историјата“, му порачува Зеленски на Путин.
Тој додава дека Украина не сака долготрајна војна и дека животот без конфликт е неспоредливо подобар, изразувајќи уверување дека и мнозинството Руси би реагирале позитивно на мирно решение.
Воедно, Зеленски предупредува дека доколку Путин не одлучи да ја прекине војната, Украина ќе продолжи да се бори за своето постоење, што може да ја загрози и неговата позиција на власт.
„Добро знаете дека во руската историја, кога земјата се уморува – следуваат промени“, се наведува во писмото.
DW
