Во текот на оваа работна седмица, односно до четврток во Македонија времето ќе биде стабилно, суво и сончево со мала до умерена локална облачност. Во утринските часови по котлините ќе има појава на магла и на ниска облачност.
И во Скопскиот регион до четврток времето ќе биде стабилно, суво, сончево и со појава на мала до умерена локална облачност. Во утринските часови ќе има појава на магла и на ниска облачност.
Што се однесува до температурите, наутро ќе биде студено, но утринските температури ќе бележат тенденција на пораст и нема да биде толку многу студено како вчерашното и денешното утро, и температурите наутро од средината на оваа седмица на повеќе места ќе се спуштаат до околу, или за неколку степени над нулата. Под нулата ќе се спуштаат само на високите места и на планините.
Максималните дневни температури пак исто така ќе бидат во пораст и ќе се искачуваат во интервалот од 7 до 15 степени.
Под влијание на нов влажен воздушен бран од запад, од петок попладне и навечер од западните предели од државава ќе започнуваат врнежи од дожд, а на повисоките планини врнежите ќе бидат од снег. Во исто време, регионот ќе го зафаќа нов снежен бран, па така на повеќе места ќе има нови врнежи од снег, како и формирање на нова снежна покривка, на планините и позначителна, стои во најновата анализа од метеопрогнозерот Славчо Попоски.
