Маск го врати профилот на Трамп на Твитер

„Народот го кажа своето. Трамп ќе биде вратен“, напиша Маск на својот профил на Твитер по резултатите од анкетата објавена меѓу неговите претплатници, кои гласаа „за“ враќање на републиканскиот политичар на платформата на Твитер.

Нешто повеќе од 15 милиони корисници на Твитер гласаа во анкетата, а тесно 51,8 отсто гласаа за враќање.

По објавата на Маск дека „народот го кажа својот збор“, на оваа социјална мрежа повторно се појави профилот на Трамп и на него се достапни стари објави на поранешниот американски претседател.

Претходно во текот на денот, Трамп не изгледаше премногу ентузијастички за неговото враќање на неговата некогаш омилена социјална мрежа.

„Не гледам причина за тоа“, рече поранешниот претседател преку видео на прашањето дали планира да се врати на Твитер на панел на годишниот лидерски состанок на Републиканската партија.