Најмалку дванаесет лица загинаа во шумски пожар во јужната шпанска покраина Андалузија. Ова беше објавено во текот на ноќта на платформата X од страна на службата за итни случаи на регионот Андалузија.
Пожарот избувнал вчера попладне во општината Лос Гаљардос, која се наоѓа околу 300 километри североисточно од Малага, во покраината Алмерија, објави регионалната влада.
„Смртните случаи се случиле во еден дел од општина Бедар; некои од жртвите биле пронајдени во нивните возила“, се вели во соопштението.
Можна причина за пожарот е оштетен далновод кој паднал врз целосно исушена вегетација. Според спасувачките служби, примени се „повеќе од 150 повици од граѓани кои го пријавиле пожарот“. Во првите извештаи, сведоците изјавиле дека паднат кабел го предизвикал пожарот. Несреќата се случила покрај автопатот, а пламените јазици „брзо се прошириле на шумската област во близина на патот“.
Меѓутоа, властите не можеа официјално да ги потврдат тврдењата на граѓаните за причината за пожарот.
Министерот за здравство: „Невидена трагедија“
Регионалниот министер за здравство, Антонио Санз, го опиша настанот како „невидена трагедија“ и наведе дека ова е шумски пожар „со најсериозни последици досега“ во Андалузија.
„Болката е неизмерна. Андалузија тагува, а нашите мисли се со Алмерија и сите погодени од оваа трагедија“, рече Санз.
Според него, околу 150 пожарникари со пет противпожарни возила, како и дополнителни спасувачки екипи, биле распоредени на терен. Жителите на неколку населби биле евакуирани на безбедни локации како мерка на претпазливост.
Највисоко ниво на предупредување поради горештини
Шпанскиот премиер Педро Санчез, исто така, изрази „длабока тага и разочарување од ужасните последици од пожарот“ на платформата X.
Шпанија, како и Португалија и Франција, во моментов се соочува со екстремен топлотен бран. Во некои делови од земјата, највисокото ниво на предупредување од горештини е во сила со денови.
Сувото време и високите температури предизвикуваат појава и брзо ширење на пожарите. Противпожарните служби во Франција и во Португалија, исто така, во последните денови се бореа со повеќе големи пожари.
DW
