Обилниот дожд и неисчистеното корито предизвикаа Маркова река да се излее и да предизвика поплави во село Батинци, општина Студеничани.
Освен поплави во домовите, поплавени се и голем дел од патиштата. Патиштата кон Батинци, но и во населбата Пинтија, како и во село Таор и Долно Лисиче се целосно блокирани од вода, а пристапот е возможен само со трактор.
Исклучена е и струјата на неколку места.
Во опасност е и мостот кој ги поврзува Драчево и Пинтија.
Жителите на овие населени места се соочуваат со сериозни проблеми во транспортот.
Ситуацијата останува критична, а локалните власти со тешка механизација се на терен и работат на создавање насипи.
Се апелира до сите жители да бидат внимателни и да избегнуваат патување во овие области додека условите не се подобрат.
