Земете голема, проѕирна пластична чаша и наполнете ја со цела рендана краставица и малку крем сирење. Потоа со ножици исечете парче чаден лосос и изрендајте црвен кромид. Прелијте со прелив за салата, неколку зрна капар, прелијте со сок од лимон, ставете семки и зачини кои го подобруваат вкусот. Пред мешавината да истече преку работ на чашата, брзо притиснете го капакот цврсто и добро протресете и – готово!
Резултатот, како што тврди Логан Мофит, е наводно „лудо“ вкусен, толку што тој не може да се засити од него. Мофит е Канаѓанец – и ѕвезда на ТикТок. Тој има речиси шест милиони следбеници, а неговите видеа со различни рецепти за салата од краставици се прегледани дури и до 30 милиони пати. Мофит, кој живее во Отава, е познат по прекарот „момчето со краставиците“.
Остров без краставици
Речиси 4.000 километри и добри осум часа лет понатаму на североисток, видеата на Мофит сега стануваат проблем. Досега, Исланд, лоциран во средината на северниот Атлантик, беше познат првенствено по своите вулкани, суровата клима и недопрените пејзажи, а не поради фактот дека неговите речиси 400.000 жители особено сакаат да јадат краставици. Земјата всушност произведува шест милиони краставици во своите оранжерии. Тоа значи околу 15 краставици за секој Исланѓанец – годишно.
Но, бидејќи Мофит почна да ги споделува своите рецепти за салата од краставици и некои исландски инфлуенсери почнаа да ги споделуваат неговите рецепти на почетокот на август, тоа веќе не е доволно. Во локалните супермаркети веќе тешко може да се најдат краставици. Сега островската држава е принудена да го увезува зеленчукот од Холандија, која е многу појужно.
Особено еден рецепт со масло од сусам, оцет од ориз и лук беше толку популарен што и другите состојки на островот се распродадоа брзо, објави Би-Би-Си – иако претставниците на здружението на исландските фармери и прехранбената индустрија веднаш се впрегнаа да го минимизираат степенот на недостигот на храна.
Возбудата доаѓа брзо, но брзо и поминува
Ова не е првпат инфлуенсерите на социјалните мрежи да предизвикаат вистинска возбуда за одредени видови храна, иако притоа не се засегнати цели земји. Во јули 2023 година, блогер за храна на ТикТок објави шарени кроасани од пекарница во Њујорк. И покрај цената од речиси десет американски долари за кроасан, пекарницата беше речиси преплавена од муштерии. Со денови се создаваа долги редици, а на моменти се продаваа само по два кроасани максимум по муштерија.
Во јануари 2024 година, швајцарскиот инфлуенсер Стив Мерсон преку ТикТок објави дека ќе дели бесплатен донер во околината на Цирих. Толпата што тогаш се формирала била толку голема што по два часа морала да дојде полиција да го прекине сето тоа. Во Нирнберг, две Јутјуберки кои создадоа сопствена салата предизвикаа гужви пред еден ресторан, а во Регенсбург тоа се случи кога три гејмерски ѕвезди преку Јутјуб и Инстаграм објавија дека таму ќе делат слатки.
Сцената на блогерите за храна станува сè попопуларна во последниве години. Бројни ТикТокери се етаблираа со свои јадења кои понекогаш изгледаат апсурдно и создадоа база на лојални обожаватели кои готват и споделуваат нивни рецепти – како што е германскиот инфлуенсер Паул Кукс, кој сака да ги украсува своите креации со сурово месо.
DW
