Четворицата астронаути од мисијата „Артемис 2“ за првпат испратија фотографии од Земјата додека патуваат кон Месечината. „Изгледате прекрасно, навистина прекрасни сте“, порача астронаутот на НАСА Виктор Гловер од капсулата „Орион“, коментирајќи ги снимките на кои нашата планета се гледа како син блескав диск со бели облачни нишки на темна позадина.
Гловер, неговите американски колеги Кристина Кук и Реид Вајсман, како и канадскиот астронаут Џереми Хансен, се првите луѓе кои се упатуваат кон Месечината по повеќе од 50 години. Екипажот тргна во вселената во ноќта кон четврток (по средноевропско време), кога капсулата „Орион“ беше лансирана од вселенскиот центар Кејп Канаверал во Флорида, со ракетниот систем „Space Launch System”.
Мисијата веќе е поблиску до Месечината
Околу 24 часа по лансирањето, екипажот со специјален маневар ја напушти Земјината орбита. Веќе по следните 24 часа, се најдоа поблиску до Месечината отколку до Земјата. „Мисијата ‘Артемис 2’ помина повеќе од половина од растојанието до Месечината“, објави НАСА во ноќта кон сабота.
Во текот на мисијата, астронаутите спроведуваат научни тестови и тренинг-операции, но уживаат и во ретки погледи. „Преку приклучната порта во моментов ја гледаме Месечината. Сликата е неверојатно убава“, изјави астронаутката Кристина Кук, според НАСА.
Мисијата не вклучува слетување на Месечината
„Артемис 2“ се надоврзува на искуствата од беспилотната мисија „Артемис 1“ од 2022 година. Екипажот ќе помине околу десет дена во вселената, патувајќи околу Месечината, пред капсулата повторно да слета во океанот на Земјата.
Слетување на Месечината не е предвидено за оваа мисија. НАСА планира такво слетување во 2028 година, а „Артемис 2“ треба да ја подготви основата за тоа.
За Гловер, Кук и Вајсман ова е втор лет во вселената, додека Хансен лета за првпат. Кук е првата жена во историјата на НАСА која учествува во мисија до Месечината, Гловер е првиот астронаут кој не е бел, а Хансен првиот Канаѓанец во ваква мисија.
Целокупниот лет на „Артемис 2“ следи траекторија во форма на бројката осум околу Земјата и Месечината, при што е предвидено екипажот да помине повеќе од 2,3 милиони километри.
DW
