Хамас ги ослободи првите од преостанатите израелски заложници во Појасот Газа. Седум заложници биле предадени на Црвениот крст во понеделник наутро, кој ќе ги донесе ослободените заложници во Израел, изјави за Ројтерс извор вклучен во операцијата. Сè уште не се објавени информации за нивната здравствена состојба.
Исламистичкиот Хамас претходно ги објави имињата на 20-те израелски заложници што треба да бидат ослободени, а кои се уште се живи. Бригадите Касам, вооруженото крило на Хамас, „одлучија да ги ослободат следните живи“ заложници, објави исламистичката палестинска организација денеска (понеделник) преку онлајн платформата Телеграм. Со ова за прв пат се потврдија имињата на 20-те израелски заложници за кои претходно се претпоставуваше дека се живи.
Израелската влада во неделата објави дека предавањето на заложниците што ги држат исламистичките палестински групи во Појасот Газа се очекува да започне „рано наутро во понеделник“. „Очекуваме сите 20 живи заложници да бидат предадени на Црвениот крст истовремено и транспортирани во шест до осум возила“, изјави портпаролката на владата, Шош Бедросијан. Само откако ќе биде потврдено пристигнувањето на сите заложници во Израел, палестинските затвореници чие ослободување е договорено, ќе бидат ослободени за возврат.
Според израелскиот премиер Бенјамин Нетанјаху, 20 заложници киднапирани за време на нападот на Хамас врз Израел на 7 октомври 2023 година се уште живи, а уште 27 се мртви. Како дел од договорот, сите преостанати заложници треба да бидат предадени од Хамас на Израел во понеделник. Исто така, треба да бидат предадени и останките на израелски војник убиен во 2014 година и држен во Појасот Газа оттогаш.
Израелски воен претставник во неделата им изјави на новинарите: „За жал, не очекуваме сите починати заложници да бидат вратени утре“. Покрај 20-те живи заложници, се претпоставува дека има и 28 мртви во Појасот Газа.
Стотици луѓе се собраа во Израел во раните утрински часови на „Плоштадот на заложниците“ во Тел Авив. Премиерот Бенјамин Нетанјаху го опиша очекуваното ослободување на заложниците како „историски настан“. Ова е придружено и со „радост поради враќањето на заложниците“ и со „тага поради ослободувањето на убијците“, рече премиерот, осврнувајќи се на ослободувањето на затворените Палестинци ветено во договорот со Хамас.
DW
