Шефот на Врховниот совет за национална безбедност на Иран, Али Лариџани, вели дека Техеран „нема да преговара“ со Вашингтон, неколку часа откако американскиот претседател Доналд Трамп вети дека ќе продолжи да ги казнува „терористите“ со „целата сила“ на американската војска.
„Нема да преговараме со Соединетите Држави“, рече Лариџани на платформата X на 2 март.
„Денес, иранската нација се брани“, додаде тој.
Претходно, американскиот претседател Доналд Трамп вети дека ќе продолжи да го казнува Иран „со полна сила“ и рече дека војната против Исламската Република може да трае четири недели, но ја остави вратата отворена за понатамошни разговори со преживеаните владетели во Техеран.
„Во изминатите 36 часа, Соединетите Држави и нивните партнери ја започнаа операцијата „Епски бес“, една од најголемите, најсложените, најразорните воени офанзиви што светот некогаш ги видел“, рече Трамп на 1 март во шестминутно видео објавено на неговата платформа Truth Social.
Трамп рече дека борбените операции во Иран „продолжуваат во овој момент со полна сила и ќе продолжат сè додека не се постигнат сите наши цели“.
Признавајќи ја загубата на тројца американски војници во конфликтот, Трамп вети дека ќе се одмазди за нивната смрт и ќе им нанесе „најсилниот удар на терористите кои водеа војна, во основа, против цивилизацијата“.
„Како една нација, жалиме за вистинските американски херои, патриотите кои дадоа најголема жртва за нацијата, додека продолжуваме со праведната мисија за која тие ги дадоа своите животи“.
„За жал, веројатно ќе има повеќе (жртви)“, предупреди тој.
Не се објавени информации за идентитетот на војниците или околностите на нивната смрт.
Трамп ги предупреди иранските безбедносни лидери – вклучувајќи го Корпусот на Исламската револуционерна гарда, војската и полицијата „да го положат оружјето и да добијат целосен имунитет или да се соочат со сигурна смрт. Ќе биде сигурна смрт. Нема да биде убаво“.
slobodnaevropa.mk
