Директните преговори меѓу завојуваните страни за завршување на руската војна против Украина беа обновени по едномесечна пауза. По воведните разговори синоќа во Абу Даби, високи воени претставници на двете страни ќе се сретнат денеска со посредство на САД. Целта на дипломатските напори во главниот град на Обединетите Арапски Емирати е достоинствен и траен мир, соопшти украинскиот преговарач Рустем Умеров по првата рунда. Набргу потоа, руските напаѓачи повторно жестоко ги гранатираа големите градови во Украина во текот на ноќта.
Началникот на Генералштабот Андриј Хнатов, како и заменик-началникот на военото разузнавање, генерал-потполковник Вадим Скибицки, денеска ќе учествуваат во разговорите на Арапскиот Полуостров, според украинските извештаи. Руската преговарачка делегација ја предводи началникот на военото разузнавање, Игор Костјуков. Од американска страна, меѓу другите, е присутен и државниот секретар задолжен за армијата, Даниел Дрискол.
„Подготвени сме, во зависност од текот на дијалогот, да работиме во различни формати“, рече Умеров. Изгледите за успех на преговорите и натаму се неизвесни. Поконкретни резултати сè уште не се објавени. Руските државни медиуми известуваат за преговорите, кои се водат во целосна изолација од јавноста.
Украинскиот претседател Володимир Зеленски рече дека вакви трилатерални состаноци не се одржани долго време. Сепак, сè уште е рано да се извлечат заклучоци за состанокот во Абу Даби, рече тој во својата вечерна видео порака. Во прв ред, Русија мора да ја заврши војната која шефот на Кремљ, Владимир Путин, ја започна во февруари 2022 година, нагласи тој.
Територијалните отстапки остануваат главен проблем
На мировните преговори во Абу Даби, кои се одржуваат без шефовите на држави и министри за надворешни работи, суштинското прашање е дали владата на Зеленски ќе се согласи со руските услови за прекин на огнот и ќе ги повлече украинските трупи од деловите од источниот индустриски регион Донбас кои сè уште ги контролира. Украина досега одбиваше да го стори тоа. Според анкетите, за тоа нема мнозинска поддршка ни меѓу населението.
Меѓутоа, дури и пред почетокот на разговорите, Кремљ повтори дека го смета ова за основен услов за примирје. Русија, за која се смета дека има предност на бојното поле, се заканува дека ќе ја продолжи војната доколку не се повлечат украинските трупи.
Москва, меѓу другото, го бара целиот регион Доњецк, од кој моментално контролира околу 80 проценти. Киев одбива доброволно повлекување. Доњецк и соседниот регион Луганск, кој е речиси целосно контролиран од руски трупи, заедно се нарекуваат Донбас.
Украина бара безбедносни гаранции и обнова
За Украина, преговорите се од особена важност и во делот на безбедносните гаранции, кои треба да утврдат како земјата ќе биде заштитена од идни руски напади по евентуален мировен договор. Зеленски тука ја гледа пред сè улогата на САД. За гаранциите тој оваа недела разговараше и со американскиот претседател Доналд Трамп на Светскиот економски форум во Давос, кој сака војната да заврши што е можно поскоро.
Владата на Трамп со месеци врши притисок врз Русија и Украина да го прекинат војувањето – досега без видлив успех.
DW
