Савески ќе го напушти Основниот кривичен суд, за да се врати во институцијата каде работеше претходно. Пред да стане судија, тој седум години работел како основен јавен обвинител во Скопје. Владата се одлучи да го предложи него од вкупно четворица кои добија позитивно мислење од Советот на јавни обвинители. Премиерот Мицкоски вели не го познава, а Савески е дециден дека јавниот обвинител не е политичка фигура.
Во услови на ниска доверба во судството и обвинителството, жед за правда и обвинувања за влијанија врз правосудството од разни центри на моќ, Северна Македонија добива нов државен обвинител.
Предлогот Ненад Савески да застане на чело на Јавното обвинителство, е на дневен ред пред пратениците во македонското Собрание на 18 март. Во текот на денот, се очекува владејачкото мнозинство во парламентот и да го изгласа.
Обвинител, судија, па, пак обвинител
Савески ќе биде деветти по ред државен обвинител на земјава од стекнувањето независност во 1991, а 19-ти воопшто откако постои функцијата од 1945 година.
Неговиот избор доаѓа и во време кога власта планира да донесе нов Закон за јавно обвинителство, за што во тек е и јавна расправа.
Неговата биографија сугерира дека тој не влегол во правосудството преку „брза лента“ туку постепено ја крадел кариерата во правосудниот систем. Почнал од најниските скалила.
По дипломирањето на државниот Правен факултет „Јустинијан Први“ во Скопје, во 2000 година почнал да волонтира како судски приправник во Основниот суд во Гостивар, од каде што и потекнува. Во истиот суд, потоа пет години (2004 до 2009) работел како стручен соработник во кривичното и граѓанското одделение.
Во меѓувреме, положил правосуден испит и ја завршил почетната обука во Академијата за судии и јавни обвинителни, за во 2009 да биде избран за јавен обвинител во Основното јавно обвинителство Скопје.
Обвинителската тога ја заменил со судска кога во 2016 бил избран за судија во Основниот кривичен суд Скопје каде последно судеше предмети во одделот за организиран криминал и корупција.
slobodnaevropa.mk
