Повереник – Градоначалникот на Општина Маврово и Ростуше, Онер Јакупоски, одржа работна средба со новиот сопственик на “Ресорт Маврово”, Љубе Кутлешоски, успешен бизнисмен од Австралија и сопственик на компанијата „Бесијан холдингс ПТИ ЛТД“ (Besijan Holdings PTI LTD).
На средбата, Љубе Кутлешоски официјално го информираше Повереник – Градоначалникот дека се целосно завршени сите правни и финансиски постапки, како и преземените обврски околу купопродажбата на Ресорт Маврово.
Со ова, процесот на сопственичка трансформација е комплетиран, што отвора пат за нов инвестициски циклус и развој на Маврово како врвна туристичка дестинација.
На средбата беше нагласена:
Подготвеност за зимската сезона:Новиот сопственик потврди дека се направени сите неопходни технички и организациски подготовки за успешна зимска сезона.
Скијачките патеки и опремата се во одлична состојба и подготвени за првите туристи.
Хотелските капацитети во функција:Беше најавено дека во наредните денови во целосна функција ќе бидат ставени сите хотели од „Ресорт Маврово“ (Спорт, Смрча, Лоџ) со што ќе се обезбеди квалитетно сместување и врвна услуга за посетителите.
Локална поддршка:Повереник – Градоначалникот, Онер Јакупоски изрази задоволство од сериозниот пристап на новиот инвеститор и нагласи дека Општината ќе биде партнер во сите идни проекти кои значат развој на туризмот и нови работни места.
„Влезот на капитал од дијаспората, конкретно од Австралија преку компанијата на Кутлешоски, е од огромно значење за нашата општина.
Вестите дека Ски центарот и сите хотели се подготвени за старт на сезоната се одличен сигнал за локалната економија.
Маврово се враќа на мапата како лидер во зимскиот туризам,“ изјави Повереник – Градоначалникот Јакупоски.
Оваа соработка најавува успешна зима и долгорочна стабилност на еден од најважните туристички капацитети во државата.
