Во врска со претстојниот попис во Албанија, кој почнува на 18 септември, Министерството за надворешни работи (МНР) ги охрабрува сите Македонци во Албанија слободно да ја изразат својата етничка, јазична и религиска припадност..

Двајцата познати активисти за правата на Македонците во Албанија, Панди Јани од Пустец, Мала Преспа и Едмонд Османи од Требиште, Голо Брдо, побараа од Македонците во оваа земја, пред попис кој почнува в понеделник да не потклекнуваат под никаков притисок и да се изјаснат она што единствено се – Македонци.

Јани, кој беше кандидат за градоначалник на Пустец на последните избори во мај годинава, вели дека местото редовно го посетуваат бугарски емисари, но оти и покрај она што го подаруваат на „некои продадени души“ нема да постигнат ништо.

Едмонд Османи, потпретседател на единствената македонска партија во оваа земја, од Требиште, соседна на Острени, каде што пред два дена престојуваше бугарската потпретседателка Илијана Јотова, придружувана од бугарски универзитетски професори и академици, вели дека вакви посети се редовни, но „попусто бараат Бугари“, зашто „ние сме Македонци и ништо друго“, вели Едмонд Османи.