Во услови на застој во дипломатските напори, американскиот претседател Доналд Трамп му се закани на Иран со уништување. „Часовникот за Иран отчукува и тие би требало што побрзо да се придвижат, во спротивно од нив нема да остане ништо“, напиша републиканецот на својата платформа Трут Соушл. „Времето притиска.“
Со слично драстични зборови Трамп му се закани на Иран уште на почетокот на април. „Цела една цивилизација ќе умре вечерва и никогаш повеќе нема да биде вратена во живот“, изјави тој на 7 април. Еден ден подоцна стапи во сила примирје, кое американскиот претседател подоцна го продолжи на неопределено време.
Засега нема трајно решение на повидок
Сепак, трајно решение за конфликтот и неговите големи економски последици засега нема. Иранскиот одговор на американскиот предлог за завршување на војната Трамп неодамна го оцени како „ѓубре“. Недостатокот од напредок во дипломатските напори за крај на војната сѐ повеќе предизвикува фрустрација во Вашингтон.
Примирјето виси на конец, изјави Трамп пред една недела. И по посетата на Трамп на Пекинг претходната недела, првично беше нејасно дали неговата посета на Кина – важен сојузник на Иран – на каков било начин придонесла за приближување на крајот на војната.
Недостатокот на напредок во дипломатските напори предизвикува растечкa фрустрација во Вашингтон. Во петокот (15.05), „Њујорк тајмс“ објави дека Пентагон се подготвува за евентуално продолжување на војната. Основната причина е што целите – особено во однос на иранската нуклеарна програма – сè уште не се постигнати.
Според „Тајмс оф Израел“, израелскиот премиер Бенјамин Нетанјаху во неделата вечерта разговарал со Трамп за можноста за продолжување на војната против Техеран. Нетанјаху претходно изјави: „Нашите очи се широко отворени во врска со Иран“. Весникот „Једиот Ахронот“ напиша дека Израел чека одлука од Трамп.
DW
