Северна Македонија ќе бара решение по најновата одлука на САД од 21 јануари да ја суспендира обработката на имигрантски визи за државјани од 75 земји, меѓу кои и Македонија. Одлуката е дел од директивата на администрацијата на претседателот Доналд Трамп за спречување на имигранти кои би можеле да станат „јавен товар“ за државата.
Муцунски: „Не е прекин, туку пауза“
Шефот на македонската дипломатија, Тимчо Муцунски, нагласува дека станува збор за пауза, а не за забрана или црна листа:
„Коректно е да се каже дека ова не влијае на сите други постапки за визи. Студентите, бизнисмените и туристите ќе можат слободно да аплицираат“, изјави тој.
Муцунски додаде: „Доколку сте стопанственик кој сака да патува во САД – слободно аплицирајте. Ако сте студент или сакате да заминете преку Work and Travel, ова не е пречка. Туристичките визи исто така не се засегнати“.
Македонија во комуникација со САД
Шефот на македонската дипломатија вели дека се во постојана комуникација со Амбасадата на САД во Скопје и со Стејт департментот. „Засегнати се мал број апликации, претежно од повозрасни граѓани. Ќе изнајдеме соодветно решение“, нагласи Муцунски.
Тој потсети на претходните проблеми со царините:„Кога се појавија информациите за тарифите, имаше критики. Но, успеавме да ги намалиме и да бидеме меѓу земјите со најниски тарифи. Истото ќе го направиме и сега“.
Муцунски најави можни позитивни промени: „Во следните шест месеци очекувам да затвориме прашања кои 20 години се обидуваме да ги решиме. Наш приоритет се бизнисот, науката и студентите“.
Кои визи не се засегнати?
Студентски визи – вклучително и Work and Travel програми
Бизнис визи – за стопанственици и деловни патувања
Туристички визи – особено за настани како Светското првенство 2026 и Олимписките игри 2028
DW
