И покрај формално договореното примирје меѓу САД и Иран, во Персискиот Залив повторно дојде до нови воени напади, што дополнително ја зголемува тензијата во регионот.
Американската војска соопшти дека извела напади врз ирански радарски позиции, додека Кувајт и Бахреин пријавија непријателски ракетни и беспилотни напади.
Според податоците на американската Централна команда за Блискиот Исток, претходно биле соборени четири беспилотни летала лансирани од Иран кон Ормускиот Теснец. Овие дронови претставувале непосредна закана за поморскиот сообраќај во една од најважните поморски рути во светот.
Потоа, американските сили извршиле напади врз радарски системи за крајбрежен надзор на иранската островска територија Кешм и во местото Горук, со цел да спречат понатамошни напади. Војската нагласува дека станува збор за дејствување во самоодбрана.
Иран возвраќа со ракети кон Кувајт и Бахреин
Како одговор, Иран лансирал седум балистички ракети кон Кувајт и Бахреин. Според американската страна, шест од нив биле пресретнати од противвоздушната одбрана, додека една не ја погодила целта.
Иранската Револуционерна гарда соопшти дека нападите биле насочени кон американски воени бази во регионот и дека претставуваат одмазда за американските удари врз ирански позиции во Персискиот Залив.
Американската војска, пак, ги отфрли тврдењата од Техеран дека во Бахреин било погодено седиштето на американската морнарица за Блискиот Исток, нагласувајќи дека тие информации се неточни. Засега, податоците од двете страни не може независно да се потврдат.
Во меѓувреме, кувајтската противвоздушна одбрана успеала да одбие повеќе ракетни и дроновски напади. Генералштабот на армијата нагласил дека експлозиите што се слушале во земјата се резултат на успешни пресретнувања на непријателските проектили.
Иран во последните денови повеќепати го напаѓа Кувајт, а само неколку дена претходно дрон погоди меѓународен аеродром, при што имало жртви и повредени.
Трамп: Иран сè уште има значителен број ракети
Американскиот претседател Доналд Трамп изјави дека ситуацијата со Иран „се движи прилично добро“, но предупреди дека земјата сè уште располага со дел од својот ракетен и арсенал на дронови.
Според него, Иран можеби задржал околу 21 до 22 проценти од своите ракети, што, како што рече, е значителна количина, иако далеку помала од претходно.
И покрај тврдењата дека голем дел од инфраструктурата за производство на ракети и дронови е уништен, Трамп призна дека Иран сè уште има капацитет за изведување напади.
Инаку, примирјето меѓу САД и Иран важи речиси два месеци, откако војната започна на 28 февруари со напади на САД и Израел врз Иран. Сепак, и покрај договорот, двете страни продолжуваат со повремени напади.
Во тек се индиректни преговори меѓу Вашингтон и Техеран за постигнување привремено решение и запирање на конфликтот, при што во следната фаза се очекува разговорите да ја опфатат и иранската нуклеарна програма.
DW
