Либан останува слабата точка во договорот меѓу САД и Иран. Израелската армија, според сопствените наводи, во текот на ноќта и во петок наутро извршила воздушни напади врз позиции на шиитската милиција Хезболах во јужен Либан. Претходно, Хезболах испукал ракети кон израелски војници, соопшти армијата на платформата X. Според воени извори, четворица израелски војници биле убиени, а уште четворица биле повредени во напад со дрон.
Според Министерството за здравство во Бејрут, на либанска страна загинале 18 лица, а 33 се повредени. Осум од загинатите биле членови на исто семејство, се наведува во соопштението.
Сите овие информации не можат независно да се потврдат.
Рамковниот договор предвидува крај на насилството и во Либан
Билатералниот рамковен договор меѓу Иран и САД предвидува сеопфатен прекин на воените конфликти во регионот, но не содржи експлицитна одредба за повлекување на израелските трупи. Милицијата Хезболах е најважниот сојузник на Иран во регионот.
Израелскиот премиер Бенјамин Нетанјаху во четвртокот ја опиша „безбедносната зона“ воспоставена од армијата во јужен Либан како бариера меѓу милицијата Хезболах и граѓаните и заедниците во северен Израел. Израел нема да се повлече се додека неговите безбедносни потреби го бараат тоа. Либанската влада, пак, областа под израелска контрола ја смета за територија окупирана спротивно на меѓународното право.
Според извори од либанските безбедносни кругови, меѓу другото, населбата Кфар Тебнит, близу Набатија, била погодена од повеќе воздушни напади. Според нив, таму дошло до борби околу стратешки важно возвишение.
DW
