Конфликтот меѓу САД и Иран околу Ормускиот Теснец продолжува да се заострува. Обединетите Арапски Емирати соопштија дека Иран нападнал нафтени танкери, при што загинал еден член на екипажот.
Американската војска, според сопствени информации, и трета последователна ноќ извела напади врз ирански цели. Ова го соопшти Централната команда на САД за регионот на платформата X.
Иранските медиуми објавија информации за експлозии долж јужниот брег на земјата. Според новинската агенција Фарс и провладиниот телевизиски канал Прес ТВ, во текот на ноќта биле регистрирани повеќе детонации на островот Киш во Персискиот Залив. Експлозии биле пријавени и во близина на пристанишниот град Бушер, на островот Кешм во Ормускиот Теснец, како и во големиот град Бандар Абас.
Ирански напади врз Бахреин и два нафтени танкери
Бахреин подоцна соопшти дека бил мета на напад. Во земјата се огласиле сирени за ракетна опасност, а населението било повикано да побара засолниште.
Според Иран, при ракетните и беспилотните напади врз Бахреин биле цел повеќе складишта за оружје, „центар за сателитски комуникации и станбена зграда на американските вооружени сили“ во рамки на воена база.
Според Министерството за одбрана на Обединетите Арапски Емирати, Иран нападнал два нивни нафтени танкери во Ормускиот Теснец. Во нападот загинал еден член на екипажот, а осум лица биле повредени.
Одговорноста за нападот подоцна ја презеде Иранската исламска револуционерна гарда. Таа соопшти дека погодила два супертанкери и ги ставила надвор од функција, откако, како што се наведува, повеќепати ги игнорирале предупредувањата и ги исклучиле своите навигациски системи.
Револуционерната гарда ги обвини САД дека ги поттикнуваат бродовите да користат нелегална пловна рута.
И Јордан рано утрината соопшти дека бил изложен на напад од територијата на Иран. Според властите, биле пресретнати четири ракети.
DW
