НАТО нема да дозволи да се создаде безбедносен вакуум во регионот, особено во услови на ескалација на конфликтите на Блискиот Исток и продолжувањето на војната во Украина. Алијансата останува посветена на заштитата на секоја своја членка, беше порачано на заедничката прес‑конференција на претседателката Гордана Сиљановска Давкова и генералниот секретар на НАТО, Марк Руте,кој престојува во официјална посета на земјава.
Руте: Северна Македонија е вреден сојузник во НАТО
„Северна Македонија е вреден сојузник во НАТО и придонесува за нашата заедничка безбедност“, изјави Руте. Тој нагласи дека земјата веќе издвојува повеќе од 2% од БДП за одбраната и дека еден таков напредок е значаен показател за нејзината посветеност.
„Постигнат е огромен напредок, а Северна Македонија даде заложби да го достигне и прагот од 5%како што беше ветено. Ова не е период да седиме мирно – сите сојузници мора да вложат повеќе во одбраната“, рече Руте, додавајќи дека таквите инвестиции носат поголема безбедност, економски раст и нови работни места.
Тој ја пофали и поддршката на Северна Македонија за Украина, оценувајќи ја како значајна и принципиелна во одбрана од руската агресија.
Сиљановска Давкова: Заедничката безбедност бара кохезија
Претседателката Сиљановска Давкова истакна дека посетата на Руте е јасен сигнал за поддршката што Северна Македонија ја ужива во рамките на НАТО. „НАТО не е само воен сојуз, туку заедница на споделена одговорност и заедничка визија. Продолжуваме да бидеме доверлива и одговорна членка“, рече таа.
Таа посочи дека поради сложената глобална безбедносна ситуација викендов го свикала Советот за безбедност, бидејќи околностите бараат будност, рано предупредување и одржливи инвестиции во безбедносните структури.
И Сиљановска Давкова и Руте нагласија дека Северна Македонија игра клучна улога во безбедноста на Западен Балкан, регион од стратегиско значење за НАТО.
„Нашата посветеност кон регионалната стабилност е јасна – нема да дозволиме да се појави безбедносен вакуум“, рече Руте, нагласувајќи ја поддршката на земјава за мисијата КФОР на Косово.
Претседателката повтори дека најголема гаранција за мирот во регионот е интеграцијата во Европската унија, повикувајќи на надминување на вештачките пречки и фокус на Копенхашките критериуми.
DW
