Американската администрација на 22 август објави дека проверува повеќе од 55 милиони луѓе со важечки американски визи за какви било прекршувања што би можеле да доведат до депортација.
Ова е дел од сè построгата акција против странците на кои им е дозволено да останат во САД.
Во писмен одговор на прашање од АП, Стејт департментот рече дека сите носители на визи, вклучително и странските туристи, се предмет на постојан преглед за да се утврди дали не се „подобни“ за влез или престој во Соединетите Држави.
Доколку се пронајдат такви информации, визата ќе биде поништена и, доколку носителот на визата веќе е во САД, тој или таа ќе биде депортиран, додаде Стејт департментот.
Откако претседателот Доналд Трамп ја презеде функцијата, неговата администрација се фокусираше на депортирање на мигранти кои се нелегално во САД, како и на носители на студентски визи и визи за размена.
slobodnaevropa.mk
