Глобалниот пазар на електрични автомобили расте значително побрзо од очекувањата. Додека во 2019 година само секој стоти продаден автомобил бил на електричен погон, минатата година веќе секој четврти нов автомобил бил електричен.
Во мај оваа година, дури 63 проценти од новите автомобили во Кина биле електрични. Освен во Кина, силен раст се бележи и во Европа, но и на други пазари ширум светот.
Сепак, вкупниот удел сè уште е релативно мал – во светот има околу 1,4 милијарди патнички автомобили, од кои 85 милиони се електрични.
Кина доминира на глобалниот пазар
Кина е најголемиот автомобилски пазар во светот и веќе со години систематски го поттикнува електричниот транспорт. Земјата инвестира во технологии на иднината, како сончева и ветерна енергија, така и во развој на батерии, клучен елемент за електромобилноста.
Благодарение на напредните истражувања и масовното производство, батериите за електрични автомобили денес чинат само една четвртина од цената од пред десет години.
Од 2024 година, електричните автомобили во Кина се поевтини од бензинските и дизел-возилата. Државата агресивно ја развива инфраструктурата за полнење, додека електричната енергија е релативно евтина.
Видови електрифицирани возила
Околу две третини од електричните возила во светот се целосно електрични и се полнат преку кабел. Една третина се хибриди кои имаат и бензински мотор како поддршка на подолги релации.
Кај плаг-ин хибридите, двата мотора можат да ги придвижуваат тркалата. Кај таканаречените EREV (Extended Range Electric Vehicle), тркалата ги движи само електричниот мотор, а бензинскиот служи за производство на струја кога батеријата ќе се испразни.
Постојат и HEV (Hybrid Electric Vehicle), кои не се сметаат за електрични возила. Тие користат бензин или дизел, со мал електромотор без надворешно полнење. Енергијата се добива при кочење и помага за намалување на потрошувачката во градски услови.
DW
