Најмалку 68 мигранти загинаа во бродолом покрај брегот на Јемен, според Меѓународната организација за миграција на Обединетите нации (ИОМ). Седумдесет и четири лица се водат како исчезнати. Се претпоставува дека и тие загинале.
На бродот, кој потекнувал од Етиопија, имало 154 лица. Дванаесет лица се спасени.
Бродот потонал покрај брегот на јужен Јемен кога се соочил со лошо време.
Многу мигранти од Африка се обидуваат да го преминат теснецот Баб ел-Мандеб во трошни бродови за да стигнат до Саудиска Арабија и другите земји од Персискиот Залив, надевајќи се дека ќе најдат работа таму. Тие често патуваат преку Јемен, и покрај војната што беснее таму со години.
Минатата година, ИОМ регистрираше пристигнување на повеќе од 60.000 мигранти во Јемен, во споредба со речиси 100.000 претходната година.
