Поранешниот грчки крал Константин Втори, чие деветгодишно владеење се совпадна со еден од најтурбулентните периоди во политичката историја на земјата, почина на 82-годишна возраст, објави државната телевизија ЕРТ.
Константин II, единствениот син на кралот Павле и кралицата Фредерика, дојде на престолот во 1964 година по смртта на неговиот татко, но неговото владеење беше обележано со политичка нестабилност што кулминираше со воен удар на 21 април 1967 година. Тој беше принуден да избега од неколку месеци подоцна од земјата откако го предводеше неуспешен пуч против тогашната владејачка воена хунта. Тој остана во странство се додека хунтата не ја укина монархијата во 1973 година.
На референдумот распишан по падот на хунтата во 1974 година од владата на национално единство на чело со Константин Караманлис, Грците по втор пат ја отфрлија монархијата, со што Константин стана последниот крал на Грција. Подоцна, Атина му го одзеде државјанството.
Во 2002 година, тој и другите членови на семејството добија отштета од 13,7 милиони евра за нивните поранешни имоти во Грција, кои го вклучуваат имотот на палатата Татои северно од Атина, кој моментално се реставрира, и вилата на Крф.
Со неговата сопруга, кралицата Ана-Мари од Грција, поранешниот крал, морнар чиј тим го освои златниот медал на Олимписките игри во 1960 година, имаше пет деца.
Во неговото последно јавно појавување во центарот на Атина минатата година, поранешниот крал беше виден во инвалидска количка, придружуван од неговата сестра, поранешната шпанска кралица Софија и други членови на семејството. Поради хронични проблеми со срцето и движењето, здравствената состојба на поранешниот крал се влошила и тој во последните месеци неколку пати бил хоспитализиран.
index.hr