Украина и Русија, како што се очекуваше, не успеаја да постигнат значителен напредок за време на вториот круг директни мировни преговори што траеја нешто повеќе од еден час на 2 јуни во Истанбул. Во исто време, двете страни продолжуваат со воздушните напади, во најголемиот и најсмртоносниот конфликт во Европа од Втората светска војна.
„Средбата заврши. Не заврши негативно“, рече портпаролот на турското Министерство за надворешни работи Онџу Кецели по разговорите на 2-ри јуни во палатата Чираган на Босфорот во Истанбул.
Очекувањата, на почетокот ниски, беа дополнително ублажени откако Украина еден ден претходно соопшти дека уништила десетици руски бомбардери со долг дострел во бранот дронови лансирани од далечина откако тие биле прошверцувани во Русија.
Деталите од состанокот не беа веднаш објавени, но се очекуваше двете делегации да ги претстават своите нацрти на таканаречените меморандуми за разбирање – документи во кои се наведени принципите на мировните разговори и можните услови за прекин на огнот.
На почетокот на разговорите, Украина се чинеше дека ја зајакнува својата преговарачка позиција откако нејзините сили погодија десетици бомбардери со долг дострел низ Русија со беспилотни летала кои беа шверцувани во дрвени сандаци на камиони, а потоа лансирани од блиски локации.
Безбедносната служба на Украина (СБУ) тврди дека дури 40 бомбардери можеби биле погодени во нападот на 1 јуни, опишан како „апсолутно брилијантен исход“ од украинскиот претседател Володимир Зеленски, кој додаде дека операцијата траела повеќе од година и пол за подготовка.
На почетокот на разговорите, се чини дека двете страни се се уште далеку од договор, а експертите велат дека шансите за пробив остануваат мали.
Зеленски на 30 мај рече дека Кремљ „прави сè“ за да се осигури дека предложените мировни разговори нема да дадат резултати откако голем напад со беспилотни летала врз вториот по големина град во Украина остави речиси десетина повредени луѓе, а по серијата воздушни напади врз Киев беа погодени повеќе станбени и цивилни објекти.
Украина во април се согласи со предлогот на САД за 30-дневен прекин на огнот, но Русија се спротивстави на планот, а многу од сојузниците на Украина го обвинија рускиот претседател Владимир Путин дека се обидува да го одолговлекува процесот за да може да ја искористи моменталната ситуација на бојното поле, каде што Русија добива на територии за кои тврди дека владее.
Голем дел од уништувањето е насочено кон цивилната инфраструктура, за која Русија тврди дека не е цел и покрај растечките докази што се чини дека покажуваат спротивното.
slobodnaevropa.mk
