Израелската армија го убила иранскиот министер за разузнавање Есмаил Хатиб, изјави министерот за одбрана на Израел, Израел Кац. „Во изминатата ноќ беше неутрализиран и иранскиот министер за разузнавање Хатиб“, соопшти Кац во средата. Тој нагласи дека Хатиб „се наоѓаше на врвот на внатрешниот апарат на режимот, одговорен за убиства и репресии во Иран, како и за поддршка на надворешни закани“.
Кац предупреди дека интензитетот на израелските напади ќе продолжи да расте. Тој изјави дека премиерот Бенјамин Нетанјаху и тој ѝ дозволиле на израелската армија да го „елиминира“ секој висок претставник на иранското раководство без потреба од дополнителни одобренија.
Ликвидации на високи ирански функционери
Кац во вторникот веќе соопшти за убиството на влијателниот ирански безбедносен функционер Али Лариџани и на командантот на паравоената милиција Басиџ, Голамреза Солејмани. Ликвидацијата на Лариџани претставува најтежок удар за раководството во Техеран од убиството на врховниот лидер на Иран, ајатолахот Али Хаменеи, на првиот ден од војната кон крајот на февруари.
По убиството на Лариџани, во Техеран денеска се одржаа масовни собири на приврзаници на владата. Според новинската агенција „Фарс“, во центарот на градот започнала комеморација за генералниот секретар на Советот за национална безбедност, кој беше убиен во понеделник вечерта. Објавените фотографии ги прикажуваат неговиот ковчег и оној на неговиот син, кој исто така загинал во израелскиот напад.
Државната телевизија емитуваше снимки од поддржувачи на режимот кои се собираат околу камион што ги превезува ковчезите низ градот. Тие оддаваа почит и на командантот на милицијата Басиџ, Голамреза Солејмани, како и на екипажот на иранскиот воен брод што беше потопен од САД во близина на Шри Ланка.
Погреб на Лариџани во шитското свето место Гом
Лариџани важеше за моќна фигура во иранскиот безбедносен апарат. Роден во ирачкиот град Наџаф, тој треба да биде погребан во Гом — шитското духовно средиште, на околу 150 километри јужно од Техеран.
DW
