Од денеска стартува системот „Сејф сити“ во рамки на проектот „Безбеден град, безбедна држава“. Камерите автоматски ќе регистрираат сообраќајни прекршоци, а до Нова година ќе трае пробниот период – возачите ќе добиваат само предупредувања, без казни. Од јануари санкциите ќе бидат целосно активни.
Прекршоците што ќе се следат во почетната фаза се: пречекорување брзина, минување на црвено, истечена сообраќајна дозвола и непрописно паркирање. Сопствениците на возила ќе добиваат СМС и е-пошта со записник и платен налог. Во првите осум дена казната може да се плати на половина, а по истекот – целосно. Плаќањата ќе бидат можно и електронски.
Камерите ќе бидат поставени во Скопје, Тетово, Куманово, како и на автопатите и експресните патишта на коридорите 8 и 10. До средината на следната година системот треба да ја покрие целата држава. Целта е поуреден и побезбеден сообраќај, особено на проблематичните локации како пешачки премини и тротоари, каде честопати се случуваат фатални несреќи.
Првите резултати ќе бидат видливи веќе во наредните недели, кога системот ќе почне да снима и предупредува, а од Нова година и да казнува.
skopjeinfo.mk
